SP/PS fiton më shumë vende në senat

SP me 12 veta në këtë dhomë ka arritur numrin më të madh të saj deri tash

Keystone

Ashtu siç mund të vlerësohej duke parë trendin në fillim të votimit, kanë dalë edhe rezultatet në raundin e dytë të zgjedhjeve për Senatin e Zvicrës. Në kantonin Solothurn ka fituar me epërsi të madhe në vota përfaqësuesi i SP/PS, Roberto Zanetto kundër atij të SVP/UDC-së, Walter Wobmann. Zanetti ka grumbulluar 47’753 vota ndërsa Wobman 26214.

Epërsi të dukshme ka siguruar edhe kandidati i SP-së në kantonin e St. Gallenit, Paul Rechtsteiner. Ai ka fituar me 70.250 vota kundrejt 49.662 votave të sfiduesit të tij nga SVP, Thomas Müller.

Rechtsteiner, që është dhe njeriu numër një i sindikatave zvicerane, me këtë fitore e siguron vendin e deputetit me «stazhin» më të gjatë në Parlament, ku ai është i pranishëm që nga viti 1986.

Në Kantonin e Lucernit kanë ruajtur vendet e tyre dy partitë e deritashme: CVP me Konrad Graber (që ka qenë edhe deri tash) dhe FDP me Damian Müller (i zgjedhur rishtas). Kandidatja nga SP Prisca Birrer-Heimo nuk ka pasur shanse ashtu si dhe ajo nga SVP Yvette Estermann.

Marrë në përgjithësi, zgjedhjet për Dhomën e Kantoneve kësaj here kanë qenë më të suksesshme për SP-në dhe më pak të suksesshme për SVP-në. Kështu SP me 12 veta në këtë dhomë ka arritur numrin më të madh të saj deri tash.