Spitali i Gjenevës do të punësojë më pak francezë

Regjioni kufitar i Francës ka akuzuar Gjenevën për diskriminim të kaluesve të kufirit, të cilët përbëjnë 40 për qind të gjithë personelit

Spitali Universitar i Gjenevës në të ardhmen do të pranojë më pak personel të matanë kufirit (nga Franca) në pozicionet udhëheqëse të tij. Kështu ka deklaruar drejtori i spitalit, Bernard Gruson për mediet zvicerane, duke prezantuar vendimin që ka marrë të premten e kaluar.

Me këtë masë ai synon që të realizojë një baraspeshë më të mirë në mes të personelit shëndetësor me banim në Gjenevë dhe atyre në regjionin kufitar, në Francë.

Nga ana tjetër, kryetari i këshillit të regjionit francez Rhone-Alpes me këtë rast ka akuzuar Gjenevën për diskriminim të kaluesve të kufirit, të cilët përbëjnë 40 për qind të gjithë personelit të Spitalit të Gjenevës.