Spitalet e mbingarkuara në Itali

Personeli spitalor, që po lufton me pandeminë e COVID-19 në Itali, është i mbingarkuar dhe i sfilitur në maksimum, tha sot një mjek në vijën e parë të frontit të krizës.

“Ne po ndihemi keq, shumë keq”, u shpreh doktor Claudio Zanon, kreu i spitalit “Valuce” në provincën veriore të Como-s, në një videokonferencë me Shoqatën e Shtypit të Huaj.

“Ndryshe nga vala e parë, personeli shëndetësor është i zhgënjyer, i pamotivuar, i stresuar, në sfilitje totale” shpjegoi Zanon, transmeton atsh, përcjell Albinfo.ch

“Na ka pushtuar një hidhërim i përgjithshëm, që po e minon luftën kundër epidemisë”, shtoi ai.

“Spitali i “Valuce” nuk ka më asnjë shtrat të lirë, përfshirë edhe departamentin e tij të kujdesit intensiv, dhe po del pa 70 nga 600 mjekët dhe infermierë, sepse ata janë infektuar me COVID-19”.

Dje,  Zanon urdhëroi mbylljen e urgjencës së spitalit, që do të thotë se nuk pranohen më ambulanca, sepse tashmë ishte e mbushur me rreth 30 pacientë që prisnin një shtrat spitali.

Como, së bashku me Monzan, Varesen dhe Milanon, është një nga provincat e rajonit të pasur verior të Lombardisë i goditur më keq nga vala e dytë e COVID-19.

Dr. Zanon tha se situata është po aq kritike, sa ishte në fillim të këtij viti në Bergamo, një epiqendër e së kaluarës së pandemisë, që u bë i njohur si “Wuhan i Italisë”.