Spanjë: Dy persona të zhdukur pas përmbytjeve nga shirat e rrëmbyeshëm në Kataloni

Keystone (AP Photo/Alberto Saiz)

Dy persona rezultuan të zhdukur të shtunën pas shirave të rrëmbyeshëm dhe përmbytjeve që kanë goditur rajonin e Katalonisë në Spanjën verilindore, shkruan DW, transmeton albinfo.ch.

Zjarrfikësit po kërkojnë përgjatë brigjeve dhe grykëderdhjes së lumit Foix, pranë qytetit Cubelles, rreth 50 kilometra nga Barcelona, për të gjetur dy personat e zhdukur.

Kryeministri spanjoll, Pedro Sanchez, u bëri thirrje qytetarëve për “kujdes të madh” dhe i kërkoi popullsisë të shmangë udhëtimet e panevojshme në 10 rajone veriore dhe lindore të vendit që ndodhen në nivel të lartë gatishmërie për përmbytje.

“Ne po monitorojmë nga afër situatën në disa komunitete me paralajmërime për shira të rrëmbyeshëm dhe stuhi,” shkroi Sanchez në rrjetin social X. Ai bëri të ditur gjithashtu se Njësia e Emergjencave Ushtarake (UME) është angazhuar në rajonin e Aragonës për t’u ardhur në ndihmë banorëve.

Shërbimi kombëtar i motit, Aemet, raportoi se pranë Barcelonës kanë rënë rreth 10 centimetra shi brenda pak orësh, ndërsa në disa zona të Katalonjës dhe Aragonës pritet që të bien deri në 60 litra shi për metër katror në vetëm një orë, duke përbërë rrezik ekstrem për përmbytje.

Si masë paraprake, kompania hekurudhore spanjolle Renfe pezulloi përkohësisht shërbimet në të gjithë Kataloninë për shkak të kushtet e vështira, transmeton albinfo.ch.

Në Barcelonë, rrugët u bllokuan nga përmbytjet, ndërsa një spital u detyrua të refuzonte pacientët për shkak të dëmtimeve në infrastrukturë. Një aeroplan që po fluturonte për në Shtetet e Bashkuara u kthye mbrapsht pasi u dëmtua në hundë nga një stuhi breshëri.

Ngjarjet e fundit rikujtojnë katastrofën e tetorit 2024, kur shirat e rrëmbyeshëm dhe përmbytjet në rajonin lindor të Valencias shkaktuan vdekjen e 225 personave, duke qenë një nga fatkeqësitë meteorologjike më të mëdha në Spanjë në dekadat e fundit, transmeton albinfo.ch.