Sot do të gjykohet në Oslo vrasësi i 77 personave, Breivik

Gjykimi i ekstremistit të djathtë, Anders Behring Breivik, autor i dy sulmeve, ku u vranë 77 persona verën e kaluar në Norvegji, është hapur sot në orën 9: 00 në Oslo. Çështja qendrore do të fokusohet në shëndetin mendor të të lartpërmendurit.

Dita e parë do t’i përkushtohet leximit të aktakuzës dhe vërejtjeve paraprake të ministrit Publik që akuzon të pandehurin për “akte terroriste”. I akuzuari do të ketë gjithashtu mundësi të shprehet rreth fajësisë së tij.

Avokati i tij, Geir Lippestad, ka thënë se klienti i tij do të vetëdeklarohet i pafajshëm. Edhe pse ai do të pranojë aktet e kryera, Breivik beson se ka vepruar “në vetëmbrojtje” kundër “tradhtarëve të atdheut”, të cilët i akuzon të jenë fajtorë të islamizimit dhe multikulturalizimit të Norvegjisë. Ekstremisti 33-vjeçar do të duhet të sqarohet të martën për veprimet e tij të cilat i ka cilësuar tashmë si “të tmerrshme, por të nevojshme”.

Pika kryesore e gjyqit, i cili do të zgjasë 10 javë, do të sillet rreth shëndetit mendor të të akuzuarit. I konsideruar sikur të jetë psikopat dhe penalisht i papërgjegjshëm në raportin e parë psikiatrik, në raportin e dytë (10 prill) ai është shpallur nga kundërekspertët sikur një person i përgjegjshëm me plot vetëdije.

Në fund të fundit, pesë gjyqtarët e gjykatës së Oslos do të marrin vendimin e tyre rreth muajit korrik. Nëse Breivik shpallet penalisht i përgjegjshëm, ai do të dënohet me 21 vjet burgim, një dënim që mund të shtrihet më pas nëse ai vazhdon të konsiderohet ende i rrezikshëm. Përndryshe, nëse ai nuk është penalisht i përgjegjshëm, do t’i nënshtrohet trajtimit psikiatrik të mbyllur, potencialisht për tërë jetën e tij.