Sonte në orën 2 fillon llogaritja verore e kohës

Në Zvicër, ndarja në kohë verore dhe dimërore ka hyrë në fuqi nga viti 1981, më vonë se në të gjitha shtetet që sot i takojnë BE-së

Sonte, në orën 2 pas mesnate, akrepat e orëve duhet t`i shtyjmë për një orë më vonë, gjegjësisht ata duhet të tregojnë orën 3 në vend se 2. Pra, Zvicra, BE dhe pjesa më e madhe e Evropës hyjnë në sezonin e llogaritjes verore të kohës.

Për të gjithë ata që e lodhin kokën me dilemën “jetike” nëse pas këtij ndryshimi u bie të flenë më gjatë ose më shkurt, përgjigja është paksa dëshpëruese: më shkurt.

Në Zvicër, ndarja në kohë verore dhe dimërore ka hyrë në fuqi nga viti 1981, më vonë se në të gjitha shtetet që sot i takojnë BE-së. Qysh atëherë dhe më parë, ka pasur e vazhdon të ketë debat për atë se a ia vlen apo jo një ndarje e tillë e kohës.

Ndërkohë, në shumicën e vendeve të Azisë dhe të Afrikës vazhdon të ketë vetëm një llogaritje të kohës: as verore dhe as dimërore.

Sinjali për ndryshimin e llogaritjes të kohës, në Zvicër vjen nga Gjermania, pasi që një antenë përkatëse në Zvicër është jashtë funksionimit që nga viti 2011.