Sommaruga BE-së: Më shumë presion Italisë për refugjatët

Zvicra po ashtu është e gatshme të mbështesë Italinë në çështje te personelit ose sa i përket regjistrimit të refugjatëve

Në prag të mbledhjes që do të mbahet në Luksemburg në nivel të ministrave të brendshëm të vendeve të BE-së ministrja zvicerane e drejtësisë dhe e policisë, Simonetta Sommaruga ka kërkuar nga Italia që t`i përmbahet marrëveshjes së Dublinit dhe të regjistrojë refugjatët që kalojnë përmes territorit italian.

Në të njëjtën kohë ajo është treguar e gatshme të diskutojë për një çelës të shperndarjes së refugjatëve në mënyrë proporcionale në shtetet përkatëse.

Zvicra po ashtu është e gatshme të mbështesë Italinë në çështje te personelit ose sa i përket regjistrimit, ka thenë Sommaruga në Luksemburg ku ndodhet për të marrë pjesë në takimin e minsitrave të BE-së.

Zvicra i ka drejtuar Komisionit të BE-së një letër në të cilën kërkohet t`i  shtohet presioni Italisë, për faktin se prej disa kohësh në Zvicër janë duke ardhur gjithnjë më shumë refugjatë nga Italia, të cilët vendi fqinj nuk i ka regjistruar fare.

Veç Zvicrës, në Bruksel kanë drejtuar ankesa me këtë motiv edhe Gjermania, Polonia, Franca dhe Britania e Madhe. Gjermania, gjegjësisht ministri i brendshëm i saj De Maiziere i ka premtuar Zvicrës përkrahje në drejtim të presionit që duhet t`i bëhet qendrës së BE-së sa u takon refugjatëve të paregjistruar në Itali.