Tifozët serbë thërrasin kundër Kosovës në ndeshjen Lugano-Partizan, në Thun

"Fakti që në skuadrën e Luganos janë katër lojtarë me rrënjë kosovare – portieri Saipi, mbrojtësi Hajdari, mesfushori Bislimi dhe sulmuesi Vladi – mund të ketë nxitur urrejtjen e tifozëve nga kryeqyteti serb"

FC Lugano ka mposhtur Partizanin e Beogradit dhe ka hyrë në play-off kualifikues të garave në Europa League. Por tifozët e Partizanit të Beogradit në këtë ndeshje kanë rënë më shumë në sy, me thirrjet e tyre kundër Kosovës, transmeton albinfo.ch.

Kështu, pas ndeshjes dhe fitores, nuk do të flitet vetëm për performancën e dy më të merituarve për fitoren, Steffen dhe Mahmud, por edhe për tifozët serbë që kanë udhëtuar atje.

Serbët  kishin sjellë më shumë tifozë në stadiumin në Thun sesa luganezët dhe kanë tërhequr vëmendjen në kuptimin negativ atje, shkruan gazeta zvicerane Blick. Gjendja u bë më e shëmtuar sidomos pas pushimit të meslojës. Pas 50 minutash lojë, skandimet si “Kosova është Serbi” bënë jehonë disa herë në Stokhorn Arenën e Thunit me pak vizitorë.

Në vazhdim gazeta sqaron sfondin e njohur të konfliktit në mes të Kosovës dhe Serbisë, duke filluar nga heqja e autonomisë në vitin 1989, duke përmendur luftën e atjeshme, viktimat e shumta dhe ndërhyrjen e NATO-s përmes sulmeve ajire mbi Serbinë.

“Para, gjatë ose pas luftës në Kosovë, janë vrarë ose janë ende të zhdukur, më shumë se 13,000 njerëz. Kosova shpalli pavarësinë e saj në vitin 2008 dhe është njohur nga 115 shtete. Deri më sot, Serbia i reziston me forcë kësaj dhe pretendon pronësinë mbi të zonën. Shumë serbë gjithashtu nuk e njohin Kosovën si shtet më vete”.

Është i njohur grupi i dhunshëm “Janjicari” nga tifozeria e Partizanit të Beogradit, shkruan gazeta, përcjell albinfo.ch. Danilo Vuçiq, djali i autokratit serb Aleksandar Vuçiq, mban lidhje të ngushta me personat, të cilët thuhet gjithashtu se kanë lidhje me krimin e organizuar. Ai thuhet se ka qenë i përfshirë në trazira në Kampionatin Evropian në Gjermani. Udhëheqësi i grupit ka qenë anëtar i partisë SNS të Vuçiqit që nga viti 2011. Në inaugurimin e Vuçiqit në vitin 2017, grupi “Janjicari” madje kishte ofruar sigurimin e ngjarjes, ehde pse Aleksandar Vuçiq është distancuar vazhdimisht verbalisht nga grupi.

Fakti që në skuadrën e Luganos janë katër lojtarë me rrënjë kosovare – portieri Saipi, mbrojtësi Hajdari, mesfushori Bislimi dhe sulmuesi Vladi – mund të ketë nxitur urrejtjen e tifozëve nga kryeqyteti serb”, përfundon artikulli.

---