Si të mbahet shtëpia e ngrohtë kur temperaturat shënojnë ulje

(KEYSTONE/Gaetan Bally)

Duke qenë se ditëve të fundit kemi parë ulje dramatike të temperaturave, jemi detyruar që të rrisim temperaturën e ngrohjeve ose t’i mbajmë ndezur gjatë gjithë kohës.

Megjithatë, ekzistojnë disa metoda të cilat ju mund t’i aplikoni që shtëpia të jetë më e ngrohtë se kurrë më parë.

Njëra që është tejet e zakonshme është organizimi i mobiljeve në banesën apo shtëpinë tuaj, sugjerojnë ekspertët. Asnjëherë mos i vendosni kolltukët pranë ngrohjes, dhe nëse është nevoja tërhiqni për disa centimetra larg.

Vendosja e mobiljeve pranë radiatorëve ndikon që të bllokohet nxehtësia e të mos depërtojë në pjesën tjetër të dhomës.

Një tjetër këshillë për ta mbajtur shtëpinë të ngrohtë është të mbani hapur derën e furrës pasi të keni gatuar. E gjithë ajo nxehtësi nuk do të shkojë më kot dhe do të keni mundësi të ngrohni dhomën.

Investoni në perde të trasha dhe të gjata deri në tokë. Kjo gjatësi do të ndihmojë që të ruhet temperatura e shtëpisë.

Përveç këtyre këshillave, ekspertët gjithashtu sugjerojnë që të mos mbuloni kurrë radiatorët, qoftë me rroba apo diçka tjetër.