Si mund të ndikojnë tek ju dy referendumet vendimtare të sigurimeve shëndetësore në Zvicër?

Çmimi i primeve të sigurimit shëndetësor zviceran është rritur ndjeshëm në vitet e fundit, duke nxitur partitë politike të ndërmarrin dy nisma për uljen e kostove. Votimet do të zhvillohen në qershor dhe ka shumë aspekte që pritet të ndikohen.

Më 9 qershor zviceranët do të hedhin votën e tyre për dy çështje, duke synuar, megjithëse në mënyra të ndryshme, të frenojnë koston vazhdimisht në rritje të sigurimit të detyrueshëm shëndetësor (KVG/LaMal), transmeton albinfo.ch.

Nisma “10 për qind”

Duke pasur parasysh primet e larta (dhe në rritje) dhe kostot e tjera të jetesës, të cilat hanë një pjesë të madhe të buxheteve të konsumatorëve me të ardhura të ulëta dhe të mesme, Partia Socialdemokrate ka udhëhequr një votim kombëtar për të kufizuar normat e sigurimit në 10 për qind të të ardhurave.

Çdo gjë mbi këtë kufi duhet të paguhet nga qeveria federale dhe kantonale, thotë partia.

Ndërsa kjo strategji mund të tingëllojë joshëse për të gjithë të lodhur nga pagesa e primeve të larta, qeveria paralajmëron se ndërsa ky propozim duket i mirë në letër, vota “po” mund të sjellë disa pasoja të rënda, shkruan thelocal.

Argumenti kryesor i saj është se kjo masë do të kushtonte disa miliardë franga në vit dhe nuk jep asnjë incentivë për të kontrolluar kostot shëndetësore.

Në vend të kësaj, Këshilli Federal dhe parlamenti kanë sajuar “kundëriniciativën” e tyre që duan që votuesit ta miratojnë. Sipas këtij propozimi, kantonet do të duhet të rrisin shumën e ndihmës financiare që paguajnë për primet shëndetësore për njerëzit me të ardhura të ulëta.

Nisma “Për prime më të ulëta”.

Nga ana e saj, partia e Qendrës ka dalë me propozimin e saj për uljen e kostove të sigurimeve shëndetësore, i cili do të votohet edhe më 9 qershor.

Ai parashikon një “frenim” të kostove shëndetësore, të cilat duhet të evoluojnë sipas ekonomisë dhe pagave.

Ky frenim do të funksiononte në të njëjtën mënyrë si frena federale e shpenzimeve. Prandaj, kur kostot e kujdesit shëndetësor tejkalojnë pagat për një vit të caktuar me 20 për qind, qeveria duhet të marrë masa për të ulur kostot.

Qeveria u kërkon votuesve të refuzojnë propozimin e Qendrës, sepse nuk merr parasysh faktorë të tillë si demografia, përparimi teknologjik në shëndetësi, si dhe varësia e pagave nga zhvillimet ekonomike.

Edhe këtu, Këshilli Federal dhe Parlamenti kanë hartuar kundërprojektin e tyre, duke parashikuar masa më të synuara, duke përfshirë objektivat specifike të kontrollit të kostos për shërbimet e kujdesit shëndetësor.

A ka ndonjë propozim tjetër në tryezë që synon të frenojë koston e primeve të sigurimit?

Po.

Ndërsa nuk janë në fletëvotim, dy ide janë debatuar në muajt e fundit.

Njëri bën thirrje për heqjen e shumë operatorëve privatë në favor të një skeme të vetme të sigurimit shëndetësor të drejtuar nga qeveria, e ngjashme me atë në Bashkimin Evropian.

Ideja tjetër që qarkullon është zëvendësimi i sistemit aktual ku tarifat përcaktohen nga faktorë të tillë si mosha dhe kantoni i banimit, dhe në vend të kësaj t’i bazojnë ato në paga.

---