Si do të ndikojë në Gjermani vendimi i BE-së për ndalimin e importit të qymyrit rus?

Gjermania është vendi me ekonominë më të madhe në Evropë i cili ka një varësi të konsiderueshme nga furnizimet ruse

Nëse BE-ja zbaton planin për të ndërprerë importet e qymyrit rus, ndikimi më i madh do të ishte veçanërisht në Gjermani, vendi me ekonominë më të madhe në Evropë, i cili ka një varësi të konsiderueshme nga furnizimet ruse me karburante fosile.

Megjithatë, ndikimi nuk do të jetë aq drastik sa një ndalim i importeve të gazit ose naftës.

Më poshtë vijojnë faktet kryesore:

Cila është rëndësia e qymyrit rus për Gjermaninë për momentin?

Pothuajse gjysma e 31.82 milionë tonëve të importuara nga Gjermania në vitin 2020 erdhën nga Rusia, sipas Shoqatës së Importuesve të Qymyrit, furnizuesi më i madh në vend deri tani.

Shtetet e Bashkuara dhe Australia janë furnizuesit më të mëdhenj të radhës. Të dhënat përfshijnë qymyrin dhe koksin e produktit të qymyrit, i cili përdoret në prodhimin e çelikut.

Çfarë po ndodh për momentin me përdorimin e qymyrit në Gjermani?

Sasia e qymyrit nga Rusia tashmë po reduktohet si një përgjigje ndaj luftës së saj në Ukrainë. Ministria e Ekonomisë tha se shumë centrale do të punojnë pa qymyrin rus krejtësisht ose do ta reduktojnë shumë atë deri në fillim të verës.

Përdoruesit e mëdhenj industrialë të qymyrit, mbi të gjitha në industrinë e çelikut, po ndryshojnë tashmë kontratat e furnizimit. Kjo do të thotë që varësia nga qymyri rus duhet të përgjysmohet në javët e ardhshme, me synimin që i gjithë vendi të largohet nga varësia e qymyrit rus deri në vjeshtë.

Çfarë pasojash mund të ketë një ndalim i menjëhershëm i importit? Kjo varet nga koha.

Zinxhirët e furnizimit kanë nevojë për kohë për t’u transferuar te furnitorët e tjerë, kështu që një ndërprerje e menjëhershme e furnizimit mund të çojë në mungesa të qymyrit pas disa javësh.

Kjo, nga ana tjetër, mund të ketë një ndikim në sektorin e energjisë elektrike, pasi rezervat e qymyrit në centrale dhe në porte do të zgjasin vetëm për “rreth katër deri në gjashtë javë”, sipas një raporti të ministrisë.
Pasi këto rezerva të jenë përdorur, centralet individuale ndoshta do të duhet të mbyllen.

Cilat alternativa ekzistojnë?

Shumë pak. Në rastin e qymyrit, Gjermania mund të reduktojë varësinë e saj nga Rusia më shpejt në krahasim me naftën dhe gazin.

“Importet e qymyrit nga Rusia mund të zëvendësohen plotësisht nga vende të tjera brenda disa muajsh, veçanërisht nga SHBA-ja, Kolumbia dhe Afrika e Jugut”, tha shoqata e importuesve të qymyrit.

Ekziston një treg botëror që funksionon mirë dhe ka sasi të mjaftueshme.

Po në minierat e qymyrit të gjermanëve? E vetmja lëndë djegëse fosile në Gjermani që nuk duhet të importohet është qymyri i murrmë, ose linjiti.

Rreth 107.4 milionë tonë linjit u minuan në Gjermani në vitin 2020, duke përbërë rreth 9.3% të konsumit total të energjisë primare në 2021.
Pjesa e qymyrit të zi me përmbajtje më të lartë ishte 8.6%. Gazi natyror kishte një peshë prej 26.7%. /Dpa

---