Si do ta rindërtonte Zvicra një thesar kombëtar, si katedralja e Parisit?

Për shumë zviceranë, djegia e Katedrales së Parisit ngjallë në kujtesë një ngjarje tjetër, djegien e urës “Kapellbrucke” të Luzernit, shkruan swissinfo, përcjell albinfo.ch.

Më 18 gusht të vitit 1993 banorët u zgjuan dhe gjetën urën e tyre të rrënuar. Pavarësisht përpjekjeve të zjarrfikësve, të cilët arritën ta shpëtonin kullën tetëkëndore, dy të tretat e urës së shekullit XIV që mbulonte lumin Reuss u dogj.

“Një copëz shtëpie, një pjesë e identitetit dhe një pikë referimi u humbën”, thotë arkitekti nga Luzerni, Jurg Rehsteiner, përcjell albinfo.ch. Ai thotë se rindërtimi i menjëhershëm pati rëndësi, sepse u ndihmoi banorëve ta përballonin më lehtë këtë humbje.

Me këtë pajtohet edhe arkitekti Andreas Hindemann, i cili është përgjegjës për katedralen e Baselit, që sivjet shënon 1000 vjet. “Ata duhet ta rindërtojnë katedralen “Zonja jonë”, është pjesë e historisë së tyre dhe ka rëndësi ndërkombëtare”, ka thënë ai.

Në rastin e urës “Kapellbrucke”, rindërtimi përfundoi brenda dhjetë muajsh.

Shkaku i zjarrit në Luzern ende mbetet i paqartë krejtësisht, por autoritetet thonë se zjarri mund të ishte shkaktuar nga një cigare e ndezur që pakujdes ishte gjuajtur nën një varkë poshtë urës.

Baseli vs Parisi

Në Basel, arkitekti Hindemann dhe ekipi punues i tij planifikojnë që ta dokumentojnë çdo gur të katedrales së qytetit, e njohur si Katedralja e Baselit.

Katedralja i kishte shpëtuar një katastrofe natyrore në tetor të vitit 1356, kur një tërmet ia shkatërroi disa pjesë, të cilat u rindërtuan në mesjetë.

Katedralja e Baselit është më modeste se katedralja e Parisit në aspektin arkitektonik, pasi kjo e dyta ka përmasa më të mëdha.

Sipas arkitektit Hindemann, në rast të ndonjë shkatërrimi, Katedralja e Baselit edhe mund të rindërtohej, por nuk do të ishte e njëjta.

“Edhe do të mundej, por mbetet sfidë e madhe ripërtritja. Në katedralen e Baselit është gjithmonë e vështirë kur duhet të zëvendësojmë diçka nga mesjeta. Një kopje kurrë nuk është e njëjtë me origjinalin”, thotë ai.

Ndërkaq, në rastin e urës së Luzernit, arkitekti Rehsteiner thotë se rindërtimi ka qenë i suksesshëm.

“Ajo urë e përmbush plotësisht rolin e saj, si diçka që identifikon vendasit dhe si një pikë referimi për qytetin e Luzernit”, përfundon ai.

---