Shteti evropian që rrit moshën e pensionit në 70 vjet nga viti 2040

(KEYSTONE/Ti-Press/Alessandro Crinari

Parlamenti danez miratoi të enjten një ligj që rrit moshën e pensionit nga 67 në 70 vjet, duke filluar nga viti 2040. Ky vendim u kalua me 81 vota pro dhe 21 kundër, pa shumë kundërshti. Megjithatë, masa mbetet e pakëndshme për shumicën e atyre që preken drejtpërdrejt.

Sipas ligjit të ri, mosha e pensionit do të jetë 70 vjet për të gjithë personat e lindur pas datës 31 dhjetor 1970, pra ata që në vitin 2040 do të jenë 69 vjeç e më shumë.

Në Danimarkë, që nga reforma e vitit 2006, mosha ligjore e daljes në pension është e lidhur me pritshmërinë e jetës dhe rishikohet çdo pesë vjet. Në vitin 2030 do të rritet në 68 vjet, ndërsa në vitin 2035 në 69 vjet, transmeton albinfo.ch.

Kryeministrja social-demokrate, Mette Frederiksen, 47 vjeçe, deklaroi verën e kaluar se do të jetë e gatshme të rishikojë sistemin sapo mosha e pensionit të arrijë në 70 vjet, dhe që nga atë moment partia e saj nuk do të mbështesë më rritjet sistematike.

Megjithatë, një sondazh i kryer në vjeshtën e kaluar nga Instituti i Kërkimeve Epinion tregoi se dy nga tre danezë duan që mosha e pensionit të ulet ose të mbahet në nivelin aktual prej 67 vjetësh.