Shtëpi për nënën kryefamiljare

I janë dorëzuar çelësat e shtëpisë së re për Lumnije Rullanin, e cila është kryefamiljare, nënë vetushqyese dhe për fat të keq edhe me aftësi në lëvizje

Komuna e Gjilanit në partneritet me Forumin e Femrave Shqiptare në Botë, me qendër në Suedi dhe në bashkëpunim me shoqatën “Feniks”, kanë dorëzuar çelësat e shtëpisë së re për Lumnije Rullanin, e cila është kryefamiljare, nënë vetushqyese dhe për fat të keq edhe me aftësi në lëvizje, shkruan faqja e Komunës së Gjilanit.

Milaim Jashari, kryetar i shoqatës “Feniks”, ka thënë se nuk ka gëzim më të madh se sa të jesh pjesë e ndërtimit të një shtëpie për familje pa kulm mbi kokë.

“Shoqata “Feniks”, është ndërmjetësuese e ndërtimit të shumë shtëpive në gjithë Kosovën. Kjo që po përurohet është e 210-ta me radhë. Ne do të vazhdojmë tutje dhe urojmë që donatorët të rriten përditë e më shumë, sepse raste të rënda ka shumë në Kosovë, që kanë nevojë për mbështetje”, ka thënë ai mes tjerash, përcjell albinfo.ch.

Në emër të Forumit të Femrave Shqiptare në Botë, kanë folur Drita Shaqiri dhe Afërdita Jusufi, të cilat kanë bërë thirrje për mbështetje të familjeve në nevojë në Kosovë dhe njëkohësisht kanë paralajmëruar se aksioni i tillë humanitar do të vazhdojë edhe më tutje.

Lumnije Rullani, në fjalën e saj para të pranishmëve, nuk ndalte dot së falënderuari të gjithë ata që e bënë me shtëpi.

“Kam kaluar jetën nëpër shtëpi të huaja. Komuna e Gjilanit për më shumë se dy vjet është duke u përkujdesur për mua dhe vajzën time. Nuk kam besuar asnjëherë, por ja sot jam bërë edhe me shtëpi të re, me kushte më të mira dhe uroj që të gjithë ata që më kanë ndihmuar mua të kenë vetëm ditë të mira, shpresoj shumë që edhe familjet tjera në gjendjen sikur unë të bëhen me kulm mbi kokë”, ka përfunduar ajo.