Shqipëria e rrezikuar nga përmbytjet

Ministri i Bujqësisë dhe Administrimit të Ujërave, Edmond Panariti tha se 3000 hektarë janë përmbytur në qarkun e Fierit, Vlorës dhe në Gjirokastër

Qindra familje shqiptare janë evakuuar nga shtëpitë e tyre në rajonin e Fierit dhe të Vlorës në Shqipëri, pasi dy lumenjtë, Vjosa dhe Semani, kanë dalë nga shtrati duke përmbytur disa lokacione. Për t’i shpëtuar qytetarët nga përmbytjet në këto rajone është angazhuar edhe Ushtria e Shqipërisë, ndërsa është shpallur gjendje emergjente.

Sipas medieve shqiptare, nga vërshimet e ujit janë mbytur shumë bagëti, ndërsa shumë ekonomi familjare janë shkatërruar. Niveli i ujit nëpër lokalitete ka shkuar në dy metra, ndërsa për familjet që kanë mbetur në mes të ujërave, janë përdorur helikopterët e ushtrisë dhe policisë.

Burim nga këto qarqe thonë se niveli i ujërave nga Semani dhe Vjosa kanë filluar të ulen, por akoma vazhdojnë të jenë kërcënues, citon Shekulli.

Në fshatrat Ferras, Martinë, Bishan dhe Poro të rajonit të Fierit, forcat e ndërhyrjes emergjente kanë evakuuar 110 familje. Operacionet më të vështira kanë qenë në vendin e quajtur “Kthesa e Qarrit” ku vetëm pas mesnate janë evakuuar 30 familje, 3 prej të cilave ishin vetëm gra me fëmijë, të cilat kishin disa orë të mbetura mbi çatitë e banesave të tyre.

Ne qarkun e Vlorës ne mesnate janë evakuuar 70 familje, të cilat rrezikoheshin nga përmbytja ne Novosele në fshatrat Mifol, Fitore, Bishan, Dëllëngë, Delishisht dhe Poro.

Kryeministri Edi Rama ka mbërritur në rajonin e Vlorës, e prekur nga përmbytjet dhe nga atje ka deklaruar se emergjencat janë përgatitur pa filluar tërbimi i motit.

“Të gjitha strukturat janë në këmbë për të shmangur çdo dëm. Nuk kemi humbje njerëzore. Do të bëhet një raport i hollësishëm i dëmeve. Kemi diskutuar me partnerët për të na ofruar mbështetje për përballimin e vështirësive. Ka ende shumë punë për të bërë, por problemet do ti adresojmë”, u shpreh Rama.

Ministri i Bujqësisë, Zhvillimit Rural dhe Administrimit të Ujërave, Edmond Panariti deklaroi për mediat se shkak për situatën kritike të përmbytjeve në jug të vendit janë bërë ndërtimet me leje dhe pa leje që janë dhënë për banesat e bizneset pranë lumenjve.

Sipas tij, ndërtimet pa kriter kanë bërë që të bllokohen kanalet e treta të kullimit, të cilat pavarësisht funksionimit të kanaleve të para dhe të dyta, e vështirësojnë tej mase tërheqjen e ujërave. Ministri informoi se 3000 hektarë janë përmbytur në qarkun e Fierit, Vlorës dhe në Gjirokastër.

Ndryshe, përmbytje nga reshjet e fundit ka edhe në zonat tjera të Shqipërisë, përfshirë edhe Lezhën e Shkodrën, por rajoni i jugut të Shqipërisë ka qenë më i atakuar nga përmbytjet.