Shqipëri: Rritet numri i turistëve në hotele në janar, prijnë italianët

(KEYSTONE/Christian Beutler)

Shqipëria vazhdon të jetë një destinacion i preferuar për turistët nga vende të ndryshme evropiane, edhe jashtë sezonit veror. Shifrat tregojnë një rritje të numrit të vizitorëve të huaj gjatë muajit janar të këtij viti, transmeton albinfo.ch.

Në raportin e publikuar nga Instituti i Statistikave bëhet e ditur se numri i vizitorëve ka shënuar një rritje prej 26.9%, ku vizitorët jo-rezidentë kanë shënuar një rritje prej 41.0%, ndërsa ata rezidentë 12.1%.

Rritja më e madhe e vizitorëve jo-rezidentë është regjistruar në zonat jo-bregdetare me 46.5% dhe në hotelet apo akomodimet e ngjashme me 38.4%.

Raporti konstaton se italianët kryesojnë për sa i përket netëqëndrimeve në strukturat akomoduese, duke lënë pas edhe vizitorët nga Kosova.

“Shumica e vizitorëve jo-rezidentë, të cilët u akomoduan në strukturat pritëse në Shqipëri, vijnë nga Italia (21%), Kosova (18%) dhe Gjermania (6%). Mbretëria e Bashkuar dhe Franca kontribuan përkatësisht me 6% dhe 5% të vizitorëve”, bën të ditur INSTAT.