Shopping-turistët shkaktojnë kolona të gjata në kufij

Kthimi nga pushimet, në njërën anë dhe shopin-turizmi i zviceranëve në Gjermani, në anë tjetër, kanë shkaktuar kolona të gjata dhe pritje në pika të ndryshme të kufirit. Ndërsa kolonave edhe ashtu të zakonshme në dy anët e tunelit Gothard, në Ticino dhe në Uri i është shtuar sot edhe bllokimi i tunelit pak para mesditës për shkak të një aksidenti që kanë pasur dy autobusë brenda në tunel.

Por, edhe pas normalizimit, kolona në të d anët e tunelit deri në pasditen e vonë ka qenë rreth 6 kilometra, dhe pritjet kanë zgjatur deri një orë, njofton viasuisse.

Kolona të gjata në Ticino priten edhe për nesër, e diele, në drejtim të veriut.

Ndërkaq në kufirin me Gjermaninë, te Bazeli, në mëngjesin e të shtunës kolona të gjata ka shkaktuar numri i madh i zviceranëve që shkonin për të blerë mallra matanë kufirit, në Gjermani ose ktheheshin prej atje, njoftojnë mediet zvicerane, transmeton albinfo.ch. Kolona më e gjatë, 12 kilometra, është regjistruar rreth mesditës në mes të Augst BL dhe Kleinhüningen BS.

Koha e llogaritur për pritje në këtë kolonë ka qenë rreth një orë.