Shokët e Viganit të vrarë, marshim paqësor kundër dhunës

Organizatorët, në një komunikatë shkruajnë se policia tashmë e ka lejuar këtë marshim paqësor

Miqtë e Vigan Morinës, të vrarë tri ditë më parë në Cyrih kanë vendosur që publikisht të japin një sinjal kundër dhunës së ushtruar në këtë rast dhe në rastet tjera. Për këtë, ata kanë zgjedhur organizimin e një marshimi nëpër rrugët e Cyrihut që do të mbahet të shtunën.

Vrasja e Viganit dhe plagosja e rëndë e vëllait të tij, Visarit ka tronditur rëndë rrethin shoqëror të dy vëllezërve dhe më gjerë. Për këtë arsye, shokët e tyre, përmes facebook-ut kanë bërë thirrje për një marshim protestues nëpër rrugët e Cyrihut që do të zhvillohet këtë të shtunë. Organizuesi i këtij aksioni, Cengiz Ajdini, në një komunikatë shkruan se policia tashmë e ka lejuar këtë marshim paqësor.

Përmes këtij marshimi dëshirohet të mobilizohen sa më shumë njerëz që ta përkujtojnë Viganin dhe që ta përpunojnë fatkeqësinë e rëndë që ka ndodhur. Veç kësaj, rrethi i miqve dëshiron që t`i tregojë familjes dhe opinionit se sa i rëndësishëm ka qenë për ta Vigani.

Gjatë marshimit që do të fillojë në Helvetiaplatz në orën 19.00 është paraparë një minutë heshtje në vendin e krimit. Marshimi përfundon në orën 20.15 në Werdmühleplatz.