“Shkolla Shqipe ABC” në Fulda festoi Ditën e Pavarësisë

Mbrëmja festive u mbajt në qytetin Fulda, ku salla u mbush me fëmijë, prindër, mësues, anëtarë të shoqatës dhe shumë pjesëmarrës të tjerë që i dhanë aktivitetit një atmosferë të gjallë dhe emocionuese

Më 30 nëntor, shoqata e mërgimtarëve shqiptarë “Shkolla Shqipe ABC” në Republikën e Hessenit të Gjermanisë festoi me madhështi 28 Nëntorin – Ditën e Shpalljes së Pavarësisë së Shqipërisë. Mbrëmja festive u mbajt në qytetin Fulda, ku salla u mbush me fëmijë, prindër, mësues, anëtarë të shoqatës dhe shumë pjesëmarrës të tjerë që i dhanë aktivitetit një atmosferë të gjallë dhe emocionuese.

Një festë e mbushur me krenari dhe atdhedashuri

Atmosfera ishte e ngrohtë dhe festive, me ngjyra kuq e zi që valëviteshin kudo. Si çdo festë e bukur shqiptare, edhe kjo ishte plot emocione të sinqerta, dashuri për atdheun dhe krenari për rrënjët tona kombëtare. Ishte një ditë e veçantë që bashkoi komunitetin shqiptar për të kujtuar dhe festuar një nga datat më të rëndësishme të historisë kombëtare.

Hapja e festës dhe vlerësimi për punën edukative

Fjalën e hapjes e mbajti kryetari i shoqatës, z. Ukë Blakaj, i cili ndër të tjera theksoi rëndësinë e madhe që ka ruajtja e gjuhës dhe kulturës shqiptare në mërgatë. Ai falënderoi prindërit që e mbështesin këtë përpjekje, duke i dërguar fëmijët në shkollën shqipe për të mësuar gjuhën amtare dhe historinë e kombit tonë. “Kjo është një thesar që duhet ruajtur me përkushtim dhe dashuri” theksoi ai.

Fjalë vlerësuese nga mësueset dhe prindërit

Në bisedë me mësuesen Alma Hani, ajo tha: “ …ishte një ditë e veçantë dhe akoma më e gëzuar. Fëmijët tanë duhet ta njohin historinë e Shqipërisë. Mësimi i historisë sonë do t’i ndihmojë të rinjtë tanë të respektojnë veten dhe të jenë krenarë për identitetin e tyre. Traditat, kultura dhe gjuha janë ura që i lidhin ata me rrënjët dhe me atdheun. Prindërit që i sjellin fëmijët në shkollën shqipe bëjnë një investim të çmuar për të ardhmen e tyre.”

Muzikë shqiptare, recitime dhe vjersha për Atdheun

Fëmijët e shkollës, të përgatitur nga mësueset e tyre të përkushtuara, kënduan himnin e flamurit me zëra të pastër dhe plot gëzim. Ata recituan poezi për Shqipërinë, flamurin dhe 28 Nëntorin, duke treguar përkushtimin e tyre për të mësuar dhe ruajtur trashëgiminë kombëtare. Interpretimet artistike të nxënësve emocionuan të pranishmit dhe i dhanë festës një kuptim më të përzemërt.

Mbështetja e shoqatave dhe Kujtimi i mësueses së paharrueshme

Në këtë festë të paharruar morën pjesë dhe anëtarë të shoqatave të tjera shqiptare. Ndër fjalimet përshëndetëse, një moment prekës ishte kujtimi për mësuesen e paharruar Shpresa Tafolli, e cila ndërroi jetë pak kohë më parë. “Ajo ishte një mësuese atdhedashëse që ia kushtoi jetën edukimit të brezave të rinj shqiptarë” kujtoi z. Blakaj me emocion.

Një sytë dhe zemrat e fëmijëve shqiptarë

Mbrëmja festive vazhdoi me muzikë të bukur artistike që ngriti peshë zemrat e të gjithëve. Të pranishmit vallëzuan dhe kënduan së bashku, duke krijuar një atmosferë të ngrohtë dhe të paharruar.

Pjesa më emocionuese dhe më e bukur ishte kur fëmijët plot entuziazëm, recituan, kënduan e na treguan sa mirë është kur bashkohesh nën tingujt e gjuhës amtare.

Emocione gëzimi dhe krenarie që për here të parë dhe për një kohë shumë te shkurtër paraqitën në këtë ditë feste, nxënësit e shkollës shqipe Hanau. Përkushtimi i mësueseve Mida Shosha-Kllokoqi, Feride Aliu-Gashi, Alma Hani si dhe mbështetja e palodhur e prindërve dhe anëtarëve të shoqatës, i dhanë kësaj feste një domethënie të veçantë dhe shpresë për një të ardhme të ndritur për gjuhën dhe kulturën shqiptare në diasporë.

Shprehje mirënjohje për punën e dobishme shoqërore

Zonja Keneda Avdiji dha kontributin e saj të çmuar në organizimin e këtij evenimenti andaj shprehim mirënjohje dhe falënderim të përzemërt.

Gëzuar Festën e Pavarësisë!

Le të mbajmë gjallë dashurinë për atdheun dhe të punojmë së bashku që gjuha dhe kultura jonë të trashëgohen tek brezat që do të vijnë. Festa përfundoi me premtimin se vitin tjetër do të mblidhemi sërish, më të bashkuar dhe më krenarë se kurrë.

Shkruan Nexhmije Mehmetaj

 

---