Shkel rregullat e trafikut në Zvicër, e kërkojnë në Shqipëri

Shoferi nga Shqipëria ka shkelur rregullat e qarkullimit rrugor dhe është shpallur në kërkim nga autoritetet zvicerane.

Sipas mediave në Tiranë, shtetasi i Shqipërisë, identiteti i të cilit nuk dihet, me automjetin e tij  me targa shqiptare AA 373 ET është shpallur në kërkim, pasi sipas hetimeve të palës zvicerane është përgjegjës për thyerjen e kodit rrugor atje.

Ka pasur apo jo pasoja shkelja e rregullave të rrugës apo aksidenti ku mund të jetë përfshirë ky mjet, ende nuk dihet.

Kërkesa e autoriteteve zvicerane drejtuar policisë shqiptare

Me një kërkesë drejtuar autoriteteve shqiptare policia rrugore zvicerane kërkon krijimin e identitetit të plotë (emër, mbiemër, datëlindje, kode postar, vendbanim, gjendje financiare, etj.) të drejtuesit të automjetit me targë AA 373 ET, duke dëgjuar zotëruesin e atij automjeti në kohën e kryerjes së shkeljes duke u informuar se kundrejt tij ka filluar një procedim penal për dhunim të trafikut rrugor, parashikuar nga legjislacioni zviceran, si edhe duke i komunikuar të drejtën për të emëruar avokat apo përkthyes.

Kjo kërkesë e palës zviceriane është miratuar nga Gjykata shqiptare, e cila tashmë i kërkon policisë shqiptare të gjejë shoferin që pas shkeljes së rregullave në rrugë është larguar nga Zvicra, raportojnë mediat në Shqipëri, përcjell albinfo.ch.