Shefi i policisë vjedh 144 mijë franga nga automatët e parkingut

Ai ka deklaruar se paratë nuk i ka përdorur për nevojat e veta por se me to ka mbështetur njerëz në nevojë. Në mesin e tyre ka pasur edhe shfrytëzues të ndihmave sociale nga Richterswili,

Një ish shef policie në komunën Richterswil të Kantonit të Cyrihut, deri sa ka qenë në detyrë, ka përvetësuar 144.000 franga të grumbulluara në automatët e parkingjeve të komunës së tij. Gjykata e Qarkut e Horgenit, i ka shqiptuar sot 48 vjeçarit një dënim prej 24 muajsh burg me kusht, shkruan landbote.ch.  Ai është dënuar për  përvetësim të kualifikuar duke qenë bartës posti zyrtar, për pastrim parashë, vjedhje dhe falsifikim të shumëfishtë dokumentesh, transmeton albinfo.ch.

Në procesin gjyqësor është konstatuar se ai ka përvetësuar para edhe nga trezori i një kolegut të punës.

Është veçanërisht interesant “arsyetimi” që ish polici i ka bërë para trupit gjykues vjedhjes klasike që ka zgjatur plot 4 vjet (2014-2018). Ai ka deklaruar se paratë nuk i ka përdorur për nevojat e veta por se me to ka mbështetur njerëz në nevojë. Në mesin e tyre ka pasur edhe shfrytëzues të ndihmave sociale nga Richterswili, ka thënë ai për herë të parë, në ditën e gjykimit. Ai madje ka shkuar aq larg sa ka thënë se enti social nuk i ka mbüështetur mjaftueshëm këta njerëz, transmeton albinfo.ch. Kështu, ish polici nuk pendohet se ka ndihmuar këta njerëz me paratë e vjedhura. Nga pikëpamja e tij, veprimet e tij nuk kanë shkaktuar dëme.

Por, kryetari i trupit gjykues ia ka kthyer se ai ka bërë një marrëzi shumë të madhe. Ai ka dëmtuar imazhin e policisë. Në të njëjtën kohë, ai ka dëmtuar edhe veten, përcjell albinfo.ch. Ish polici 48 vjeçar ka mbetur pa partneren, pa banesë dhe pa punë.

---