Shefi i “Nestle”-s, kundër kontingjenteve për të huajt

"Për ta ruajtur poziten prestigjioze që ka, kompania duhet të ketë mundësinë që t`i punësojë profesionistët më të mirë" ka thenë Peter Brabeck

Në rast se Zvicra do të zbatoje në mënyrë konsekuente politikën e kontingjenteve të kufizuara të të huajve, kompania më e madhe ushqimore në botë, e që selinë e ka në Zvicër, “Nestle” do të ndodhet para një problemi serioz. “60 për qind të investimeve që ne bëjmë për hulumtime, i bëjmë në Zvicër”, ka thënë kryetari i koncernit të industrisë ushqimore, Peter Brabeck për radion zvicerane srf. 

Por, ka plotësuar ai, për ta ruajtur poziten prestigjioze që ka Zvicra, kompania duhet të ketë mundësinë që t`i punësojë profesionistët më të mirë. Dhe, nëse këtë nuk do të mund ta bëjmë, ne “detyrohemi që qendrat kërkimore t`i vendosim jashtë Zvicrës”.

Ndonëse ka siguruar se selia e kompanisë do të vazhdojë të mbetet në Zvicër, Brabeck ka bërë të qartë se “Nestle” “nuk është zvicerane”. Në mesin e pronarëve të koncernit sot dy të tretat janë shtetas të huaj ndërsa përgjegjësia e stafit menaxherial u drejtohet në radhë të parë aksionarëve.

Më tutje Brabeck ka thënë se ai “nuk e kupton përse Zvicra, nga njëra anë dëshiron të jetë qendër e kërkimit dhe inovacionit në nivel botëror ndërsa nga ana tjetër këto rezultate dëshiron t`i realizojë vetëm me personelin e vet, lokal. “Kjo nuk funksionon”; ka siguruar ai.