Sërish rrëshqitje dheu në Bondo

Shkak për këtë, kësaj here thuhet të kenë qenë rreshjet e mëdha të shiut

Keystone, foto nga arkiva

Rreth një javë pas rrëshqitjes së parë të shkëmbit në Bondo, regjioni Bergell në Kantonin Graubünden, mbrëmë rreth orës 21.30  sërish ka pasur rrëshqitje. Shkak për këtë, kësaj here thuhet të kenë qenë rreshjet e mëdha të shiut, njofton srf.ch.

Ende nuk dihen saktësisht përmasat e dëmit të shkaktuar me këtë rast. Por ajo që shihet është se rruga e vjetër kantonale, e vetmja që kishte mbetur e paprekur nga rrëshqitja e parë dhe e dytë, kësaj here është mbuluar nga orteku i baltës, transmeton albinfo.ch. Në lokalitetin Spino, dy persona është dashur të evakuohen me Rega.

Para kësaj, një zëdhënës i shtabit drejtues të komunës Bregaglia, pjesë e së cilës është edhe fshati Bondo, kishte paralajmëruar se kanoset rreziku për rrëshqitje edhe në një kodër tjetër, në afërsi, Piz Cengalo. Bëhet fjalë për një vëllim prej një milion kubikësh gurë.