Sërish grabitet një bankë në Prishtinë

Grabitjet e bankave në Prishtinë janë bërë shqetësim për banorët. Pothuajse çdo javë ndodh një grabitje e tillë dhe deri tash askush nuk është arrestuar. Persona të armatosur kanë grabitur një pikë të BKT-së në lagjen “Veternik” në Prishtinë, shkruan, albinfo.ch

Policia thotë se gjersa personat e maskuar kanë arritur të ikin në drejtim të panjohur me një veturë të zezë të tipit Golf.

“Dyshohet se kjo grabitje është realizuar nën kërcënimin e armëve, po ashtu personat e dyshuar kanë sulmuar fizikisht një person dhe janë larguar nga vendi i ngjarjes. Personi i lënduar, sigurim i bankës, është dërguar për tretman mjekësor, ndërkohë që policia po punon me përkushtim për të identifikuar personat e dyshuar dhe vendndodhjen e tyre”, thuhet në njoftim.

Policia ka ftuar qytetarët që kanë informacione lidhur me rastet kriminale, e veçanërisht për këtë rast t’i ndihmojnë ata për zbulimin e akteve të tilla.