Serbët e veriut kërkojnë shfuqizimin e vendimit për targa dhe formimin e Asociacionit  

@albinfo.ch

Serbët e mbledhur në sheshin e pjesës veriore të Mitrovicës janë shpërndarë të qetë pas protestës, e cila u organizua nga përfaqësuesit e tyre politikë.

Ata përmes kësaj proteste kundërshtuan vendimin e Qeverisë së Kosovës për të mos lejuar qarkullimin me targa ilegale, vendim ky që rezultoi me largimin e serbëve nga institucionet. Nga organizatorët e protestës u tha se ky organizim u bë për të treguar “unitet dhe për t’i thënë Evropës, njëzëri, se Serbia është vendi i tyre”.

Përveç vendimit për targat, krerët e Listës Serbe kanë kërkuar edhe formimin e Asociacionit të komunave me shumicë serbe. Kryetari i Listës Serbe, Goran Rakiq, ka kërkuar që Asociacioni të formohet, siç është rënë dakord në Bruksel, në kuadër të dialogut Kosovë-Serbi. Tutje ai bëri të ditur se nuk do të kthehen në institucionet e Kosovës, deri sa të realizohen kërkesat e tyre.