Së shpejti në Maqedoni, vetëm me letërnjoftime

Qeveria e Kosovës ka konfirmuar se kalimi i kufirit në pikën kufitare në mes të Kosovës dhe Maqedonisë mund të bëhet së shpejti vetëm me letërnjoftim.

Edhe pse ende nuk është nënshkruar marrëveshja midis dy shteteve, Ministria e Punëve të Brendshme, e udhëhequr nga Skender Hyseni, ka konfirmuar se së shpejti pritet të bëhet një gjë e tillë.

“Duke u bazuar në marrëveshjen për kushtet e udhëtimit për shtetasit e Republikës së Kosovës dhe shtetasit e Republikës së Maqedonisë, e cila ende nuk është nënshkruar (por pritet të nënshkruhet) parashihet kalimi i kufirit në mes të dy vendeve me letërnjoftim”, thuhet në përgjigjen e MPB-së dhënë për gazetën “Zëri”.

Ndryshe, zëdhënësi i Qeverisë së Maqedonisë, Muhamet Hoxha, ka deklaruar para disa ditëve se Qeveria e “Gruevskit” ka kaluar tekstin e marrëveshjes në Kuvend dhe të dy qeveritë kanë obliguar ministrat e Punëve të Jashtme që ta nënshkruajnë atë.

Sipas Hoxhës, duke u nisur nga e drejta ndërkombëtare dhe marrëdhëniet miqësore, me këtë marrëveshje shtetasit e njërit apo shtetit tjetër mund të hyjnë në territorin përkatës me letërnjoftime biometrike dhe pa viza, në të gjitha vendkalimet kufitare.