Rrugë me shumë pengesa për tu regjistruar në gjimnaz

“Është thjesht cinike, kur fëmijëve tanë ua vështirësojmë kaq shumë qasjen në gjimnaze, ndërkohë që importojmë akademikë nga e gjithë bota”

Në Zvicër pranohen në gjimnaze mesatarisht rreth 20 për qind të nxënësve që kanë mbaruar shkollimin fillor. Kjo është ndër përqindjet më të ulëta të kësaj kategorie në krahasim me vendet perëndimore.

Një gjendje e tillë ka nisur të nxisë kundërshtim dhe rezistencë te elita arsimore por edhe te populli. “Është thjesht cinike, kur fëmijëve tanë ua vështirësojmë kaq shumë qasjen në gjimnaze, ndërkohë që importojmë akademikë nga e gjithë bota”, ka thënë për emisionin 10vor10 profesori i historisë nga Cyrihu Philipp Sarasin.

Ai me këtë rast i është referuar politikës arsimore në nivel federal, e cila prej vitesh ua ka kufizuar gjimnazeve numrin e të regjistruarve në mesatarisht 20 për qind.

Më tutje 10vor10 ballafaqon drejtoreshën për arsim në Kantonin e Cyrihut, Regine Aeppli me pasojat e rigorozitetit të fitimit të maturës. Emisioni paraqet edhe udhëheqësit e studiove të njohura të mësimit, të cilat po përballen me një fluks në rritje të prindërve që duan t`i përgatisin fëmijët e tyre për gjimnaz.