Rritet numri i punëtorëve të huaj nga zonat kufitare

Gjatë vitit 2013 në Zvicër punonin afër 280 mijë të huaj të zonave kufitare. Më shumë se gjysma (52.4%) të tyre janë nga Franca

Numri i atyre që jetojnë jashtë vendit dhe që kalojnë për çdo ditë kufirin për të punuar në Zvicër është rritur për 3.8 për qind vitin që shkoi.

Gjatë vitit 2013 në Zvicër, siç tregon Zyra Federale për Statistika, punonin afër 280 mijë të huaj të zonave kufitare. Më shumë se gjysma (52.4%) të tyre janë nga Franca, afër një e katërta (23.7%) nga Italia dhe një e pesta (20.5%) nga Gjermania. Vetëm 2.9 për qind vijnë nga Austria.

Rreth dhjetë për qind të të punësuarve në regjionin e Liqenit të Gjenevës dhe në atë të Zvicrës Veriperëndimore (Bazeli me rrethina) jetojnë jashtë vendit, dmth. matanë kufirit. Por prani dukshëm më të theksuar në mesin e të punësuarve të huajt kanë në Tesinë, në pjesën jugore të Zvicrës që kufizohet me Italinë, shkruan srf.ch. Në këtë kanton ata përbëjnë 25.6 për qind të të gjithë të punësuarve.

Në shumicën e madhe të rasteve, punëtorët “kufitarë” bëjnë punët që kërkojnë kualifikime më të ulëta, gjegjësisht janë punëtorë ndihmës në degë të ndryshme të ekonomisë.