Rritet numri i fëmijëve të keqtrajtuar në Gjermani

Vitin e kaluar në gjithë Gjermaninë u morën në mbrojtje 40.200 fëmijë nga Zyra e Mbrojtjes së Fëmijëve

Nga viti në vit rritet numri i fëmijëve të abuzuar dhe keqtrajtuar në Gjermani. Sipas Zyrës Federale të Statistikave vitin e kaluar në gjithë Gjermaninë u morën në mbrojtje 40.200 fëmijë nga Zyra e Mbrojtjes së Fëmijëve. Kjo shifër nuk ka qenë asnjë herë kaq e lartë dhe është 43 për qind më e lartë se pesë vjet më parë. Zyrat marrin në mbrojtje fëmijët nëse ata janë në situata të rrezikshme. Zakonisht një gjë e tillë ndodh vetëm përkohësisht dhe fëmijët kthehen në familje pas pak kohësh.

“Numri më i madh i rasteve vjen nga prindër shumë të rinj, fëmijë vetëm me njërin nga prindërit shumë të ri, prindër që vuajnë nga varësia ndaj alkoolit dhe prindër më sëmundje psikike. Këtu unë shoh një rritje të madhe, sepse është rritur numri i të sëmurëve psikikë.”, tha  Renate Schäfer-Sikora nga Zyra e Mbrojtjes së Fëmijëve në Këln, ku numri i fëmijëve të marrë në mbrojtje ka pësuar një rritje të fortë ashtu si në të gjithë Gjermaninë, transmeton DW.

Numri i familjeve me këto probleme sociale sot është më i madh se në të kaluarën..

“Sot ne nuk kemi një rrjet social mbrojtës përmes familjeve të mëdha apo përmes disa vlerave të qëndrueshme në komunitetet fetare, përmes ndihmës së fqinjëve ose sistemit të asistencës familjare, të cilat kanë vepruar si faktorë stabilizues”, përshkruan këto ndryshime në shoqëri psikoterapeuti për fëmijë dhe të rinj në Këln, Wolfgang Oelsner.

“Një gjë e tillë nuk mund të neglizhohet. Sot e gjithë barra bie mbi familjen dhe ajo duhet të përballojë shumë.”

A duhet që zyrat për mbrojtjen e fëmijëve të ndërhyjnë më shpesh, për shkak se për shumë familje mungon ndihma nga të afërmit dhe fqinjët? Ose pse ka gjithnjë e më shumë të rritur që vuajnë nga sëmundjet psikike? Sipas Schäfer-Sikora arsyet se pse gjithnjë e më shumë fëmijë merren në mbrojtje, qëndrojnë në vend tjetër: Njerëzit janë bërë më të kujdesshëm.

Një dallim nga e kaluara, sot shumë fëmijë dhe të rinj të keqtrajtuar u tregojnë mësuesve të tyre ose drejtohen tek Zyra e Mbrojtjes së Fëmijëve.

“Më parë fëmijët e varfër mendonin se nuk duhet të tregonin dhe të fshihnin rastin kur babai i alkoolizuar kishe goditur nënën”, thotë Wolfang Oelsner.

Sot të rinjtë, falë edhe edukimit të tyre në shkolla, janë gati të tregojnë kur kanë nevojë për ndihmë, shkruan DW.