Rritet numri i fëmijëve të infektuar me koronavirus në Kosovë

KEYSTONE/EPA/VALDRIN XHEMAJ

Numër i madh i fëmijëve janë duke u infektuar ditëve të fundit me Covid-19 në Kosovë.

Sipas të dhënave nga Shërbimi Spitalor Klinik dhe Universitar i Kosovës, vetëm ditën e enjte gjithsej 37 fëmijë nën moshën 10-vjeçare janë infektuar me Covid-19 nëpër të gjitha komunat e Kosovës.

E pesë fëmijë janë të shtrirë në Klinikën e Pediatrisë në QKUK, të cilët po marrin tretman mjekësor.

Këtë e ka bërë të ditur për Gazetën Infokus shefja e Repartit të Hemato-Onkologjisë te Klinika e Pediatrisë në QKUK, Violeta Grajçevci.

“Numri i fëmijëve që janë të hospitalizuar është pesë. Këta janë të hospitalizuar në repartin Covid”, tha Grajçevci.

E për gjendjen e pesë fëmijëve, ajo për Gazetën Infokus tha se është relativisht stabile.

“Po, gjendja relativisht e mirë, tani një fëmijë është me oksigjeno-terapi, të tjerët janë stabil”, shtoi ajo.

SHSKUK-së ka njoftuar se gjithsej 702 pacientë janë të shtrirë në klinikat Covid dhe spitalet e përgjithshme.

Sipas njoftimit, 603 të konfirmuar Covid-19 pozitivë, 539 me oksigjeno-terapi dhe 28 në gjendje të rënduar shëndetësore.

Në QKUK, 262 pacientë të shtrirë, 226 prej tyre Covid-19 pozitivë, dhe 215 me oksigjeno-terapi.