Rriten sulmet ndaj qendrave të azilantëve

Zyra Federale e Kriminalistës (BKA) tha se po shtohet rreziku për sulme ndaj azilantëve, por edhe ndaj ndihmësve të tyre

KEYSTONE

Zyra Federale e Kriminalistës (BKA) ka alarmuar mediat se refugjatët dhe aktivistët humanitarë kanë shumë gjasa të vihen gjithnjë e më shumë në shënjestër të ekstremistëve të djathtë.

Sipas një dokumenti edhe menaxherët e qendrave të strehimit, por edhe politikanët mund të bëhen objekt sulmesh.

Madje edhe persona që nga pamja e jashtme mund të konsiderohen si refugjatë, ka rrezik të jenë pre e sulmeve të ekstremistëve të djathtë.

Sipas këtij institucioni gjerman, “spektri shumë i heterogjen i ekstremistëve të djathtë” gjen në këtë pikë “konsesusin ideologjik”.

Krahas zjarrëvënieve, autorët janë të gatshëm të përdorin edhe gjësende tjera për të silmuar azilkërkuesit.

BKA i trembet edhe përdorimit të formave të reja si bllokadën e shinave të trenit apo të autostradave për të penguar ardhjen e refugjatëve.

Thomas de Maiziere bëri përgjegjës, sipas DW, nxitjen e urrejtjes nga ana e ekstremistëve të djathtë për shtimin e dhunës kundër refugjatëve dhe politikanëve që angazhohen për refugjatët. Sulmet kundër qendrave të azilantëve ai i cilësoi si “të turpshme dhe një turp për vendin tonë”.

Megjithatë ministri i  brendshëm gjerman theksoi se bëhet fjalë për indicidë të veçantë, dhe se “ende nuk mund të flitet për terrorizmin e djathtë”.

Megjithatë “rreziku qëndron dhe ne e kemi fokusuar këtu vëmendjen”, ka thënë de Maiziere.

Mbi rrezikun e terrorizmit të ekstremistëve të djathtë në Gjermani ka paralajmëruar edhe shërbimi sekret gjerman.

Kreu i Entit të Mbrojtjes Kushtetuese, Hans-Georg Maaßen ka thënë për gazetën “Stern” se “nuk mund të përjashtojmë që në një klimë të tillë të krijohen grupime të caktuara që janë të gatshme për të bërë atentate me sfond ekstremist”.

Sulmet në rritje kundër qendrave të azilantëve po tregojnë se pragu për të përdorur dhunën po shkelet gjithnjë e më shpesh.