Rreth 633 milionë euro remitenca nga diaspora

pixabay

Besnik Kada nga Banka Qendrore e Kosovës (BQK) ka njoftuar se për gjashtë muajt e parë të këtij viti shuma e remitencave është 632 milionë e 900 mijë euro.

“Krahasuar me 555 milionë e 400 mijë euro në vitin 2022, pra kemi një rritje prej 77.5 milionë euro më shumë, krahasuar me gjashtëmujorin e njëjtë të vitit paraprak”, tha Kada për RTK.

Remitenca më së shumti erdhën nga Gjermania.

“Në tremujorin e parë të këtij viti nga Gjermania kanë ardhur 38.8 milionë euro, në ndërkohë vitin e kaluar, pra gjatë 12 muajve nga Gjermania kanë ardhur 161.5 milionë euro. Në ndërkohë nga Zvicra në tremujorin e parë kanë ardhur 17.2 milionë, pasuar nga SHBA-ja me 7.6 milionë euro, Austria dhe Italia me nga 4.8 milionë secila e kështu me radhë”, deklaroi ai, përcjell albinfo.ch.

Safet Gerxhaliu, njohës i ekonomisë, tha se po vazhdon edhe më tutje solidarizimi i diasporës me Kosovën.

“Kur shohim se diaspora ka dërguar mbi 77 milionë euro më shumë këtë vit se në vitin 2022, është dëshmi se diaspora është njëra ndër shtyllat kryesore të përkrahjes së Kosovës”, tha ai për RTKlive.