Rossier prezanton iniciativën për migracionin masiv në Bruksel

"Duhet gjetur një rrugë e cila mundëson jetësimin e iniciativës por pa e shkelur marrëveshjen për lëvizje të lirë të personave në mes të Zvicrës dhe BE-së"

Rreth dhjetë ditë pas votimit të iniciativës “Kundër migracionit masiv”, kanë filluar përpjekjet për prezantim të këtij rezultati para institucioneve të EB-së. Në këtë mision, të enjten ka vizituar Brukselin sekretari shtetëror në Ministrinë e jashtme të Zvicrës, Yves Rossier. Ai është pritur atje nga kryediplomati i BE-së David O`Sullivan në takimin e parë pas ndryshimit që ka ndodhur ditë më parë në Bernë. 

“Tash duhet gjetur një rrugë e cila mundëson jetësimin e iniciativës por pa e shkelur marrëveshjen për lëvizje të lirë të personave në mes të Zvicrës dhe BE-së”, ka thënë Rossier.

Sullivan nga ana e tij ka theksuar se BE-ja respekton parimet që ndjek Zvicra. “Por Zvicra duhet po ashtu të respektojë parimet tona dhe këtu bën pjesë lëvizja e lirë”, ka bërë të ditur kryediplomati evropian.

Në kuadrin e marrëveshjes kornizë për zgjidhjen e “çështjeve institucionale”, Qeveria e Zvicrës, sipas Rossier pledon për udhëheqjen e negociatave teknike  paralelisht me jetësimin e iniciativës. Sullivan ka thënë se edhe BE e dëshiron një rrugë të tillë. Takimi i ardhshëm në mes të dy palëve është vendosur të mbahet para festës së Pashkëve. (albinfo.ch&sda)