Robin (Haxhi) Krasniqi: Jam gati për fitore!

27 vjeçari kosovar me nënshtetësi gjermane beson se do ta fitojë këtë sfidë drejt luftës për titullin e kampionit të botës në “WBA”, ku pritet të ndeshet me Jurgen Brahmer

Boksieri kosovar me nënshtetësi gjermane Haxhi Krasniqi (i njohur edhe me emrin Robin) është i gatshëm për fitoren e radhës. Ai rikthehet në ring këtë të shtunë për t’i kryqëzuar duart me boksierin polak Dariusz Sek.

Kanë mbetur edhe pak orë para duelit të boksit profesionist mes bokësierit kosovar Robin Haxhi Krasniqit dhe polakut Dariusz Sek. Numri 2 i botës në kategorinë gjysmë të rëndë, Krasniqi rikthehet sonte (20 dhjetor) pas pesë vitesh para publikut të Munihut.

Meçin që do të zhvillohet në sallën “Ballhaus Forum” në hotelin “Dolce” pritet ta përcjellin mbi 3000 shikues, shqiptarë dhe gjermanë. Në duelin profesionist të radhës, junikasi do të mundohet të mbrojë titujt e tij WBA Continental dhe WBO International.

“ I kam bërë të gjitha përgatitjet e mundshme!”. “Jam gati për të mboshtur kundërshtarin!” “Edhe pak orë na ndajnë nga fitorja e madhe!”, janë postimet e fundit që Haxhi Krasniqi ka postuar në rrjetet e tij sociale duke kërkuar mbështetjen e gjithë simpatizuesve të tij, transmeton “albinfo.ch”

27 vjeçari kosovar me nënshtetësi gjermane beson se do ta fitojë këtë sfidë për të hapur rrugën në luftën për titullin e kampionit të botës në “WBA”, ku pritet të ndeshet pastaj me Jurgen Brahmer.

Sfida e sotme mes Krasniqit dhe polakut Dariusz Sek nis në orën 22.00 dhe transmetohet edhe në televizionin publik të Kosovës “RTK1”

Albinfo.ch