Rita Ora flet për karrierën, familjen dhe muzikën në “The Jennifer Hudson Show”

Nga skena te jeta private: Rita Ora rrëfen përvojën e saj në SHBA

Këngëtarja shqiptaro-britanike Rita Ora ishte mysafire në emisionin e njohur amerikan “The Jennifer Hudson Show”, ku ndau me publikun detaje nga karriera e saj artistike, përvojat televizive dhe jeta personale, transmeton albinfo.ch.

Gjatë intervistës, Ora foli për rolin e saj si gjyqtare në spektaklin shumë të ndjekur “The Masked Singer”, duke theksuar se atmosfera në panelin e jurisë është e mbushur me humor, energji dhe emocione pozitive. Ajo e përshkroi ekipin si një “familje televizive”, ku çdo episod sjell hamendësime të papritura dhe momente argëtuese, shpesh edhe jashtë kamerave.

Rita u ndal edhe te performanca e saj e këngës “Golden”, duke zbuluar se kjo këngë ka një domethënie të veçantë personale për të, ndaj nuk është interpretuar nga artistë të tjerë. Sipas saj, kënga përfaqëson një periudhë të rëndësishme në jetën dhe rrugëtimin e saj artistik.

Në bisedë, këngëtarja foli edhe për stilin personal, duke treguar se pamjen e saj në emision e kishte realizuar vetë, si shprehje e identitetit dhe stilit të saj unik artistik.

Një nga momentet më të ndjera të intervistës ishte rrëfimi për propozimin që ajo i kishte bërë bashkëshortit të saj, regjisorit Taika Waititi, si dhe për marrëdhënien e ngushtë që ka ndërtuar me vajzat e tij, duke theksuar rëndësinë që familja zë në jetën e saj.

Episodi u mbyll me një moment të veçantë muzikor, ku Rita Ora dhe Jennifer Hudson improvizuan një duet, duke mahnitur publikun me energjinë dhe fuqinë e tyre vokale në skenë.

Paraqitja e Rita Orës në “The Jennifer Hudson Show” u prit me interes të madh nga fansat, duke rikujtuar edhe një herë ndikimin e saj të vazhdueshëm në skenën ndërkombëtare të muzikës dhe televizionit./Albinfo.ch

---