Reperi EAZ mbështet Përparim Avdilin për kryetar të Cyrihut me këngë të re: “Eine vo ois”

Reperi i njohur me rrënjë shqiptare Arbër Rama, i njohur me emrin artistik EAZ, ka shprehur publikisht mbështetjen e tij për Përparim Avdilin, kandidat për kryetar të qytetit të Cyrihut, përmes një kënge të re të titulluar “Eine vo ois”.

Premiera e këngës do të bëhet më 30 janar, gjatë një showcase-i ekskluziv dhe falas që EAZ do të mbajë në klubin Plaza në Cyrih. Koncerti do të zgjasë 30 minuta dhe do të përfshijë hitet më të njohura të reperit. Kulmi i mbrëmjes pritet të jetë pikërisht prezantimi për herë të parë i këngës së re, e cila është shkruar posaçërisht për Përparim Avdilin.

Sipas organizatorëve, EAZ është frymëzuar nga biografia e Avdilit, të cilën e sheh si të ngjashme me historinë e tij personale – një rrugëtim suksesi me prejardhje migrante në Zvicër.

Kujtojmë se Arbër Rama (EAZ) u shpall fitues i çmimit për hitin muzikor të vitit në edicionin e fundit të Swiss Music Awards me këngën “Juicy”, ndërsa platforma albinfo.ch e ka shpallur atë “Personalitet i Vitit 2024 në fushën e muzikës”, duke konfirmuar ndikimin e tij jo vetëm në skenën muzikore zvicerane, por edhe në diasporën shqiptare.

Ngjarja do të shoqërohet gjithashtu me një “Polit-Jukebox”, ku 15 kreativë do të prezantojnë 15 ide për një Cyrih më kreativ, më gjithëpërfshirës dhe më modern.

Biletat janë falas, por numri i vendeve është i kufizuar dhe mund të merren përmes faqes zyrtare të Plaza-s. Lokali është i përshtatshëm edhe për persona me karrocë invalidësh.

lexoni po ashtu:

Përparim Avdili, djathtisti jokonvencional që po sfidon të majtën në Cyrih

Lexoni po ashtu:

Përparim Avdili hap fushatën për kreun e qytetit të Cyrihut