Rekord: Mafisë siciliane i konfiskohen 1.3 miliard euro!

Autoritetet supozojnë se i arrestuari është në fakt marionetë e Matteo Messina Denaro, njeriut numër një të mafisë italiane, i cili kërkohet prej vitesh nga policia

Në një aksion të gjerë kundër mafisë, policia siciliane i ka konfiskuar një ndërmarrësi mafioz pasurinë në vlerë prej 1.3 miliard eurosh. Kjo është shuma më e madhe që është konfiskuar ndonjëherë në luftë kundër interesave ekonomike të mafisë.

Siç bëjnë të ditur autoritetet e drejtësisë, ndërmarrësi 57 vjeçar, falë lidhjeve të tij të mira me krimin e organizuar kishte zënë një pozicion të lartë në fushën e energjisë me diell dhe me erë. I dyshuari kishte avancuar nga profesioni i elektricistit në ndërmarrës të madh në prodhimin e energjive të ripërtërishme.

Atij, me rastin e arrestimit, i janë konfiskuar prona jo vetëm në Sicili por edhe në regjione tjera të Italisë si në Lombardi dhe në regjionin e Romës.

Autoritetet supozojnë se i arrestuari është në fakt marionetë e Matteo Messina Denaro, njeriut numër një të mafisë italiane, i cili kërkohet prej vitesh nga policia.