Referendum për sekretin bankar

Zviceranët me referendum do të vendosin edhe për sekretin bankar në vend.

Tashmë iniciatorët kanë mbledhur mbi 117 mijë nënshkrime në favor të iniciativës popullore “Po, në mbrojtje të sferës private”.

Iniciativa synon rregullimin me kushtetutë të sekretit bankar në vend. Ndër të tjera, shkëmbimi automatik i informacionit do të përjashtohet në nivel vendi.

Shoqata e bankierëve nuk e ka mbështetur nismën.

Sipas iniciatorëve të nismës, shkëmbimi automatik i informacioneve bankare brenda vendit do të dëmtonte besimin ndërmjet shtetit dhe qytetarit.

Sipas nismëtarëve të referendumit, tashmë ka ardhur koha për t’u dhënë fund këtyre tendencave, të paktën brenda vendit.

Komiteti iniciator mendon se çdo person me vendbanim në Zvicër duhet të jetë i mbrojtur në jetën e tij private financiare.

Nismëtarët saktësojnë se iniciativa nuk mbron as evazionin dhe as mashtrimet fiskale.

Zviceranët mund të deklarohen për këtë iniciativë në referendumin e vitit 2016.