Reagime të shumta pas rrahjes me grushte mes deputetëve

Lajmi është përkrahur edhe në mediat e rajonit, si në Maqedoni e Shqipëri, duke u habitur për ngjarjen që ka ndodhur

Rrahja mes deputetëve Frashër Krasniqi dhe Milaim Zeka ‘live’ në një emision në “Klan Kosova”, ka zgjuar reagime të shumta në Kosovë, por edhe më gjerë, shkruan albinfo.ch.

Videoja e rrahjes ndërmjet tyre është shpërndarë me të madhe në rrjetet sociale, duke marrë shumë reagime.

Por, lajmi është përkrahur edhe në mediat e rajonit, si në Maqedoni e Shqipëri, duke u habitur për ngjarjen që ka ndodhur.

Pas përleshjes ka reaguar edhe Milaim Zeka. “Unë në çdo debat televiziv do tu tregoj njerëzve çfarë manipulantësh dhe çfarë rrugaçësh janë një pjesë e njerëzve të Vetëvendosjes. Ai u ndez kur unë i thashë që është krijesë e SHIK-ut. Mua më vjen keq që ndodhi ajo gjë, por ndodhi mrekullia që t’i tregohet popullit kush janë këta njerëz”, është shprehur Zeka.

Gjithashtu edhe NISMA për Kosovën ka dënuar ashpër sulmin fizik ndaj Deputetit të Parlamentit të Kosovës, Milaim Zeka. Ata me anë të një komunikate kanë kërkuar që Vetëvendosje të distancohet nga kjo që ka ndodhur, por deri më tani VV nuk ka reaguar.

I vetmi që ka reaguar është Fisnik Ismaili. “Kjo ke për atë gazetaren, që i pat thanë lopë e Danimarkës”, ka shkruar Ismaili në “Facebook”.

Për rrahjen mes deputetëve ka reaguar edhe Kushtrim Reshitaj, i cili ishte moderator i këtij emisioni. Thjesht ndjej keqardhje për shikuesit, të cilët prisnin debatin e paralajmëruar për mungesën e seancave parlamentare, vazhdimësinë e tyre gjatë muajit tetor si dhe fushatën parazgjedhore”, ka shkruar Reshitaj.

Gjithashtu shumë analistë kanë reaguar, duke dënuar atë çfarë ka ndodhur. Rrahjen e deputetëve e kanë dënuar edhe shoqëria civile.

https://www.youtube.com/watch?v=IFLKb1I7gys