Rama në Gjermani: Për Shqipërinë dielli lind nga Perëndimi

Keystone

Mësohet se kryeministri i Shqipërisë, Edi Rama, po qëndron aktualisht në Gjermani, përcjell albinfo.ch.

Ai dhe zëvendëskancelari gjerman, Robert Habeck, do të jenë oratorët kryesorë në ceremoninë e sotme të ndarjes së Çmimit të Karlit të Madh për vitin 2024 në Aachen.

Çmimi i Kalrlit të Madh jepet që nga viti 1950. Atë e marrin individë dhe institucione që kanë kontribuar në bashkimin dhe përparimin e Evropës.

Këtë vit, çmimi i jepet kryerabinit Pinchas Goldschmidt, President i Konferencës së Rabinëve të Evropës, për rolin e tij të rëndësishëm në promovimin e dialogut dhe tolerancës ndërmjet komuniteteve të ndryshme fetare në Evropë.

Rama mori pjesë dje në panelin “Perspektiva Evropiane e Ballkanit Perëndimor”, i cili u zhvillua në Aachen. Ai foli për procesin e integrimit të Shqipërisë në Bashkimin Evropian, i cili sipas tij është një prioritet për vendin e tij.

Rama tha se populli shqiptar është populli më proevropian në Evropë dhe shtoi se për Shqipërinë dielli lind nga Perëndimi.

“Nuk flas gjermanisht, shumë e vështirë për mua dhe jam mjaft i nderuar që të flas në këtë forum. Po ashtu është kënaqësi që të marrim një moment për të folur për një vend të Evropës që pret të bëhet pjesë e BE-së, megjithëse është në qendër të Evropës”, theksoi Edi Rama.