Qielli ndriçohet nga një meteor i ndritshëm, pamje spektakolare në Zvicër

“Top zjarri” me ngjyrë të gjelbër ndriçon qiellin mbi Zvicër dhe Itali

Një fenomen i pazakontë ndriçoi qiellin e Zvicrës italiane mbrëmjen e së hënës, më 8 dhjetor, rreth orës 21:00, kur një vijë e ndritshme u pa për afro 9 sekonda mbi qiell. Raportime u regjistruan nga zona e Bellinzonës dhe nga shumë pjesë të Italisë, përcjell albinfo.ch.

Fenomeni, i njohur si “top zjarri” (term jo-shkencor për meteorë jashtëzakonisht të ndritshëm), u dallua për ngjyrën e tij të gjelbër, ndërsa pamjet u dokumentuan nga dhjetëra video amatore të shpërndara në internet. Sipas Shoqatës Astronomike të Tiçinos, bëhet fjalë me shumë gjasë për një meteor që i përket shiut meteorik Geminids.

Ekspertët shpjegojnë se ngjyra e gjelbër vjen nga përmbajtja e magnezit në përbërjen e shkëmbit, ndërsa shkëlqimi i jashtëzakonshëm lidhet me madhësinë e fragmentit që hyri në atmosferë.

Ditët në vijim pritet të jenë të favorshme për vëzhgimin e yjeve që bien, sidomos gjatë netëve të kthjellëta, duke e bërë këtë periudhë ideale për dashamirët e astronomisë.

---