Qeveria këshillon qytetarët: shmangeni Maqedoninë

Aktualisht kufiri është i mbyllur për të gjitha automjetet, ndërsa kalimi i këmbësorëve bëhet pa pengesa nga të dyja anët e kufirit. Situata është e qetë dhe stabile, njofton MTI

Për shkak të përkeqësimit të raporteve ekonomike, Qeveria e Kosovës iu bën thirrje qytetarëve të saj që të shmangin vizitat në Maqedoni, për shkak të situatës së papërshtatshme atje. Sipas qeverisë së Prishtinës, në Maqedoni të shkohet vetëm, në raste emergjente.

Për shkak të bllokimit të kufirit që është bërë me automjete transportuese dhe autobusë në territorin e Maqedonisë para pikëkalimeve kufitare në Bllacë dhe Jazhincë të Maqedonisë, qytetarët e Kosovës momentalisht lejohen të kalojnë kufirin vetëm në këmbë.

Në ndërkohë, Ministria e Tregtisë dhe Industrisë i njofton qytetarët e Republikës së Kosovës se masat e ndërmarra për bllokimin e importit të produkteve me origjinë nga Maqedonia mbesin në fuqi deri në vendimin e palës maqedonase për heqjen e të gjitha barrierave tregtare dhe të lëvizjes së lirë të njerëzve.

“Aktualisht kufiri është i mbyllur për të gjitha automjetet, ndërsa kalimi i këmbësorëve bëhet pa pengesa nga të dyja anët e kufirit. Situata është e qetë dhe stabile”, thuhet në një komunikatë të MTI-së.

Qeveria e Kosovës, siç thuhet në vazhdim, mbetet e përkushtuar për zgjidhjen sa më të shpejtë dhe në rrugë institucionale të problemeve tregtare dhe të lëvizjes së lirë të qytetarëve me Republikën e Maqedonisë.