Qeveria e Zvicrës kundër rritjes së numrit të ministrave nga 7 në 9

Rritja në 9 e numrit të ministrive, sipas qeverisë do të nënkuptonte ngarkesa administrative më të mëdha se që do të ishin përfitimet nga kjo

Keystone

Këshilli Federal i Zvicrës (ekzekutivi i vendit) ka hedhur poshtë propozimin e bërë nga Komisioni për Politikë Shtetërore i Parlamentit për rritjen në nëntë të numrit të pjesëtarëve të qeverisë.  Siç dihet, qeveria ka 7 anëtarë dhe sipas tyre nuk ka probleme substanciale sa i përket përfaqësimit regjional e gjuhësor të Zvicrës, që do ta bënin të nevojshëm këtë zgjerim.

Propozimi i komisionit në fjalë parashihte që të bëheshin dy ndryshime në tekstin e kushtetutës. Në njërin prej tyre do të përcaktohej se Këshilli Federal duhet të ketë 9 në vend të 7 anëtarëve që ka tash. Me këtë do të sigurohej përfaqësimi adekuat regjional dhe gjuhësor i Zvicrës si dhe do të ndahej në mënyrë më të barabartë barra e qeverisë në më shumë sektorë, thuhet në një komunikatë të Këshillt Federal.

Ndryshimi i dytë do të bëhej ashtu që një nen për përfaqësimin gjuhësor të formulohej ndryshe. Në atë formulim do të mundësohej që variantet e kushtetutës në gjuhë të ndryshme të koordinohen më mirë. Këshilli Federal nuk e ka hedhur poshtë këtë ndryshim.

Duke hedhur poshtë pikën e parë, atë të zgjerimit në 9 anëtarë, Këshilli Federal ka theksuar se Asambleja Parlamentare Federale që vepron sot, është e obliguar të sigurojë përfaqësimin adekuat në qeveri të regjioneve dhe gjuhëve. Kjo dhe po e realizon këtë funksion.

Nga ana tjetër, rritja në 9 e numrit të ministrive, sipas qeverisë do të nënkuptonte ngarkesa administrative më të mëdha se që do të ishin përfitimet nga kjo.