Qeni endacak kafshon pesë veta

Një qen endacak ka kafshuar të enjten tre fëmijë dhe dy të rritur në Unterentfelden të kantonit Aargau. Shumë patrulla policore dhe një autoambulancë kanë shkuar në vendin e ngjarjes për të shpëtuar të plagosurit.

Qeni duket se ka ikur pa u vënë re nga e zonja e tij si dhe nga vendbanimi i saj, për të shkuar para një shkolle. Fëmijët gjatë pushimit në mes të orëve janë përballur në oborrin e shkollës me qenin, bën të ditur policia.

Qeni, vetëm aty, nga shkaqe të panjohura, është bërë agresiv dhe ka sulmuar një numër personash, njofton agjencia e lajmeve sda. Me atë rast tre fëmijë të moshave mes 3 e 10 vjeçare dhe dy persona të rritur kanë pësuar lëndime nga kafshimi i tij dhe është dashur të marrin trajtim mjekësor, transmeton albinfo.ch. Ndërkaq, kur në vendin e ngjarjes është afruar policia dhe autoambulanca, qeni sërish ka pasur sjellje të qetë dhe normale.

Megjithatë, Shërbimi Veterinar i Kantonit e ka konfiskuar përkohësisht qenin.