Qasja e Serbisë ndaj shqiptarëve në Luginë, pengesë për dialog

Qasja e Serbisë ndaj shqiptarëve të Luginës së Preshevës është pengesë në dialogun mes Kosovës dhe Serbisë. Kështu deklaroi ministri i Drejtësisë i Kosovës, Selim Selimi, pas një takimi me kryetarin e Këshillit Kombëtar Shqiptar në Bujanoc, ndaj të cilit Gjykata e Bujanocit padrejtësisht hodhi padi dy ditë më parë për ngritjen e flamurit kombëtar në vitin 2019, raporton albinfo.ch.

“Serbia duhet të kuptojë që në Bujanoc, Preshevë e në Medvegjë ekzistenca e shqiptarëve është e pashmangshme.
Ky akt i ulët është kundër respektimit të shqiptarëve që jetojnë atje. Kjo qasje është e gabuar dhe pengesë për vazhdimin e dialogut Kosovë-Serbi. Që të ecim përpara, duhet të respektojmë të drejtat e njëri-tjetrit. Shqiptarët në atë pjesë duhet të gëzojnë të drejta të barabarta, njëjtë sikurse serbët që jetojnë në Kosovë. Si ministër i Drejtësisë i kam dhënë të gjithë mbështetjen e nevojshme për tejkalimin e kësaj sfide që është puro politike, e aspak shkelje e ligjit”, ka shkruar Selimi në rrjetin social Facebook.