Punësohen katër mijë serbë në administratën e Kosovës

Janë më shumë se 4.500 serbë të punësuar në administratë, ndërsa na takojnë edhe katër mijë vende", ka thënë Rashiq

Në bazë të të dhënave zyrtare, të bëra publike nga ministri në largim i Ministrisë Punës dhe Mirëqenies Sociale, Nenad Rashiq, që vjen nga Partia e Pavarur Liberale (SLS), parti që ka siguruar tetë deputetë në zgjedhjet e jashtëzakonshme parlamentare të 12 dhjetorit, aktualisht në Kosovë janë të punësuar mbi 4.500 serbë, ndërsa ky numër pritet të shtohet gjatë viteve të ardhshëm.

Sipas tij, me hyrjen e SLS-në qeverinë e re, serbëve të Kosovës do t’u sigurohen më shumë se katër mijë vende të reja të punës në administratë.

Anëtari i Kryesisë së SLS-së ka thënë për mediat serbe se prej 12,5 për qind të vendeve në administratën e Kosovës të parapara për bashkësitë joshqiptare, 8.5 për qind i takon bashkësisë serbe.

“Për momentin janë më shumë se 4.500 serbë të punësuar në administratë, ndërsa na takojnë edhe katër mijë vende”, ka thënë Rashiq.

Sipas tij, SLS-ja do të jetë më shumë e përfaqësuar në qeverinë e ardhshme sesa deri më tani. Rashiq ka thënë partisë së tij  do t’i takojnë më shumë se dy ministri, sa kanë pasur në përbërjen e fundit qeverisëse, kur ishte në koalicion me PDK-në dhe LDK-në.