Publikohen receta për trajtimin e COVID-19 në Kosovë, reagon Ministria e Shëndetësisë

Facebook

Gjatë ditës së diel, në rrjetet sociale në Kosovë janë shpërndarë “receta” të ndryshme lidhur me trajtimin mjekësor në shtëpi kundër COVID-19

Prandaj, lidhur me këtë, ka reaguar Ministria e Shëndetësisë së Kosovës, e cila u ka bërë thirrje qytetarëve që të mos bien pre e publikimeve, ku po prezantohen “receta” të ndryshme për trajtimin e personave me COVID-19, sëmundjen që e shkakton koronavirusi.

“Duke qenë që ‘recetat’ e tilla provokojnë edhe reagime të ndryshme dhe ngjallin edhe shqetësime, ju lusim që të mos bini pre e publikimeve të tilla dhe për çfarë do shqetësimi lidhur me COVID-19 të kontaktoni mjekun tuaj më të afërt dhe të përcillni vetëm këshillat zyrtare, të cilat publikohen nga Ministria e Shëndetësisë, IKSHPK, profesionistët kompetentë shëndetësorë dhe institucionet kredibile dhe të konfirmuara”, thuhet në reagimin e MSH-së, përcjell albinfo.ch.

Aktualisht, në botë nuk është zbuluar ende një vaksinë kundër koronavirusit të ri, ndonëse përpjekje për një gjë të tillë po bëjnë shumë shtete dhe kompani në mbarë botën.

Në Kosovë, sipas të dhënave të fundit, 5,735, janë infektuar me koronavirus. Prej tyre, 135 pacientë kanë vdekur dhe 2,968 janë shëruar.