Pse ka rënë nataliteti në Zvicër

Ilustrim, Pixabay

Numri i foshnjave të lindura në Zvicër ka rënë në nivelin më të ulët në 20 vjet, sipas të dhënave të fundit nga Enti Federal i Statistikave.

Ekspertët besojnë se problemet financiare ose zgjedhjet e stilit të jetesës mund të jenë shkaku, shkruajnë mediat zvicerane, përcjell albinfo.ch.

Në vitin 2022 ka pasur 82 mijë lindje në vend, me një rënie prej 8.5% krahasuar me vitin 2021. Që nga viti 2010, numri i fëmijëve të lindur për grua është luhatur në rreth 1.5, por vitin e kaluar kjo shifër ra në 1.39, nën mesataren evropiane.

Valérie-Anne Ryser, Doktoreshë e Shkencave Sociale në Universitetin e Lozanës, thotë se ka shumë shpjegime të mundshme për rënien e natalitetit. Njëra është se pandemia dhe vështirësitë ekonomike që rezultojnë për disa sektorë të shoqërisë kanë bërë që njerëzit të shtyjnë fillimin ose rritjen e familjeve.

Ajo gjithashtu beson se mungesa e fleksibilitetit në politikën familjare në Zvicër do të thotë se gratë priren të mbajnë përgjegjësi për kujdesin ndaj fëmijëve, gjë që e bën të vështirë për to balancimin e jetës profesionale dhe familjare. Ajo thotë gjithashtu se rënia e natalitetit mund të jetë për shkak të një zgjedhjeje të qëllimshme për të mos pasur fëmijë.