Pse gjatë verës në Alpe do të ketë reshje shumë më intensive në të ardhmen?

Reshjet e shkurtra dhe intensive të verës në rajonet alpine të Evropës ka të ngjarë të bëhen më të shpeshta dhe të rënda në të ardhmen për shkak të ngrohjes globale, sipas një studimi të publikuar të enjten nga Universiteti i Lozanës (UNIL).

Studiuesit thanë se në një skenar ku temperaturat rriten me dy gradë Celsius (rreth 3.6 gradë Fahrenheit), Alpet dhe rajonet përreth mund të përjetojnë episode të reshjeve intensive të verës dy herë më shpesh se aktualisht, transmeton albinfo.ch.

“Me një ngrohje të tillë, një stuhi intensive që pritet aktualisht një herë në 50 vjet mund të ndodhë një herë në 25 vjet në të ardhmen,” tha universiteti zviceran, i cili kreu studimin në bashkëpunim me Universitetin e Padovës në Itali.

“Ajri i nxehtë mban më shumë lagështi (rreth shtatë për qind më shumë për shkallë), duke intensifikuar aktivitetin e stuhisë”, thanë studiuesit.

“Meqenëse mjedisi alpin ngrohet më shpejt se mesatarja globale, ai është veçanërisht i prekur,” shtuan ata.

Studimi përdori të dhënat e reshjeve të verës të mbledhura nga gati 300 stacione meteorologjike nëpër Alpet Evropiane në Zvicër, Gjermani, Austri, Francë dhe Itali.

Ata u fokusuan në ngjarjet rekord të reshjeve – që zgjasin nga 10 minuta në një orë – që ndodhën midis viteve 1991 dhe 2020, si dhe temperaturat që lidhen me këto episode.

“Ardhja e papritur dhe masive e vëllimeve të mëdha të ujit mund të tejkalojë kapacitetin absorbues të tokës”, gjë që mund të “shkaktojë përmbytje të shpejta dhe rrjedhje mbeturinash, duke shkaktuar dëme në infrastrukturë”, tha Nadav Peleg, një studiues në UNIL dhe autori kryesor i studimit.

Studiuesit rekomandojnë “përgatitjen e sistemeve urbane të menaxhimit të ujit dhe infrastrukturave të tjera” që nuk janë të përshtatshme për të përballuar vëllime të konsiderueshme të reshjeve.

“Përditësimi i menjëhershëm i standardeve të inxhinierisë dhe planifikimit urban” do të ndihmonte në zbutjen e rreziqeve të mundshme që lidhen me këto ngjarje, shtuan ata, duke theksuar gjithashtu nevojën për “të kufizuar ngrohjen globale në 1.5C ose më pak mbi nivelet aktuale”.

Sipas shkencëtarëve nga paneli IPCC i Kombeve të Bashkuara për ndryshimet klimatike, ka një shans 50 për qind që temperaturat globale të rriten mesatarisht me 1.5C deri në 2030-2035.

“Ne po vëzhgojmë tashmë një tendencë drejt stuhive të intensifikuara të verës dhe kjo prirje pritet të përkeqësohet në vitet e ardhshme”, tha Francesco Marra, një studiues në Universitetin e Padovës dhe një bashkautor i studimit.