Protestojnë islamistët në Prishtinë

Organizatori i protetsës, Fuad Ramiqi u është drejtuar ligjvënësve: ‘Ose i plotësoni kushtet, ose i bartni pasojat"

Disa qindra besimtarë islamë, duke iu kundërvënë vendimeve të ligjvënësve të Kosovës, për të mos lejuar futjen e fesë e të shamive në shkollat publike të vendit, janë mbledhur sot në një namaz-protestë para kuvendit të Komunës së Prishtinës.

Ideatorët e kësaj proteste, nga lëvizja “Bashkohu” kanë kundërshtuar propozimin e kryetarit të Prishtinës Isa Mustafa, i cili ka ofruar hapësirën komunale para godinës së PTK-së për ndërtimin e xhamisë së kërkuar nga besimtarët, fillimisht me motiv se nuk po kanë hapësirë të mjaftueshme në kryeqytet për të falur namazin.

Ata janë këmbëngulës për hapësirën ku tash ndodhet një çerdhe e fëmijëve, duke kërcënuar të zgjedhurit nga populli. Fuad Ramiqi ka thënë aty:　 ‘Ose i plotësoni kushtet, ose i bartni pasojat”. Ramiqi i ka quajtur politikanët kosovarë komunistë, shkruan koha.net.

Para qeverisë, ndërkohë, turma e besimtarëve ka kërkuar me zhurmë plotësimin e dy kushteve të tjera: mësim-besim dhe bartjen e shamisë në shkolla. Në tubimin tek Teatri Kombëtar ka folur edhe imami Shefqet Krasniqi, i cili ka thënë se nuk do të lejohet që Kosova të shndërrohet në një vend ateist.

Protestuesit kanë brohoritur parulla në arabishte, të njohura e të dëgjuara nga tubime të ngjashme islamiste në botë.

Gjatë gjithë kohës protesta është siguruar nga forcat e policisë dhe nuk ka pasur ndonjë incident. Rreth orës 15 ata u shpërndanë të qetë.